Strákarnir niður um eitt sæti

Karlalið Hamars spilaði 2 leiki í 2.deild Íslandsmótsins í blaki um helgina sem leið.
Leikirnir voru gegn Völsungi á Húsavík annarsvegar og Blakfélagi Fjallabyggðar (BF) hinsvegar.
Fyrir leik helgarinnar voru Hamarsmenn í 2. sæti á undan Fjallabyggð en Völsungar vermdu botnsæti deildarinnar.
Leikjafyrirkomulagið hjálpaði Hamri lítið, en eftir langan akstur norður á Húsavík voru strákarnir lengi í gang og lentu 2 – 0 undir. Þá var díselvélin hinsvegar orðin heit og með bakið upp við vegginn, unnu þeir næstu 2 hrinur og tryggðu sér oddahrinu, sem þeir svo unnu og fengu fyrir vikið 2 stig af 3 mögulegum út úr leiknum.
Fimm hrinu leikur var hinsvegar erfiður undirbúningur fyrir leikinn gegn fersku liði Fjallabyggðar daginn eftir. Eftir sannfærandi tap í fyrstu hrinu sýndu strákarnir þó betri takta og börðust hetjulega þó 3-0 tap hafi verið niðurstaðan.
Blakfélag Fjallabyggðar tefldi fram nokkuð endurnýjuðu liði með ungum og efnilegum leikmönnum. Nokkuð sem Hamarsmenn væru alveg tilbúnir að búa að en endurnýju leikmanna í liðinu hefur gengið erfiðlega undanfarin ár.

Niðurstaða helgarinnar, 2 stig af 6 mögulegum í hús og BF fór uppfyrir liðið á töflunni og Hamar er því í 3ja sæti þegar 4 leikir eru eftir af tímabilinu.

/by

Karlaliðið hélt uppi heiðri Hamars

Uppskeran var heldur rýr eftir blakhelgina miklu sem leið. Af 11 blakleikjum helgarinnar, töpuðu kvennaliðin tvö 5 leikjunum hvort en karlaliðið vann sinn leik í oddahrinu 3-2.

Það er því ljóst þegar tveimur keppnishelgum af þremur er lokið að bæði kvennaliðin munu í lok mars, berjast fyrir sæti sínu í deildunum.
Karlaliðið er hinsvegar í gríðarlega spennandi toppbaráttu í 2. deildinni en þar eru 3 lið jöfn í 1. – 3. sæti með 18 stig, Vestri, HK-B og Hamar. Í 4. sæti kemur svo Blakfélag Fjallabyggðar með 17 stig.

B lið Hamars keppti á Akureyri um helgina
/by

Stór blakhelgi framundan

Það er mikið að gera hjá blakdeildinni um helgina en karlaliðið keppir í 1. deildinni klukkan 19:00 í kvöld gegn Aftureldingu B.
Karlaliðið er í toppbaráttu 1. deildarinnar og mikilvæg stig í boði gegn Aftureldingu.

Kvennaliðin spila svo sína hvora 5 leikina. Á Akureyri er keppnishelgi í 5. deild og þar er B-lið félagsins í botnbaráttu. í Kórnum í Kópavogi er keppt í 2. deild og þar er A-liðið um miðja deild.

Samtals spila lið Hamars því 11 blakleiki á Íslandsmóti um helgina.

/by

Frábær byrjun á blakvetrinum

Blaktímabilið hófst formlega um helgina þegar haustmót Blaksambands Íslands fór fram í Mosfellsbæ.

Keppt var í 5 deildum kvennamegin og 2 karlamegin.
Mótið er ekki hluti af Íslandsmótinu og því ekki öll lið landsins sem taka þátt en Hamar sendi bæði kvennalið félagsins til keppni. Á mótinu er liðum raðað í deildir eftir getu í samræmi við skráningu þeirra á Íslandsmótinu og kepptu liðin því í 2. og 5. deild.
Það er óhætt að segja að Hamar hafi byrjað veturinn vel því liðin unnu alla leiki sína á mótinu 2-0 og urðu því haustmótsmeistarar í 2. og 5. deild.
Á meðfylgjandi myndum er 2. deildar liðið og hluti 5. deildar liðsins.
Enn er pláss fyrir áhugasama blakara í deildinni, karla og konur. Upplýsingar um æfingatíma fást í gegnum netfangið hamarblakdeild@gmail.com.
/by

Blak er ekki bara fyrir fullorðna

Mikil vakning hefur verið í blaki undanfarin ár og hefur fjöldi iðkenda vaxið gríðarlega hratt.

Þessi aukning hefur þó aðallega átt sér stað í fullorðinsflokki en Hamar í Hveragerði hefur undanfarin ár einnig boðið upp á krakkablak og eru efnilegir blakarar að líta dagsins ljós í félaginu.
Tvær þeirra, þær Marey Birgisdóttir og Ása Jóhannsdóttir Wolfram tóku ásamt öðrum efnilegum ungum blökurum frá fjölda félaga, tóku á dögunum þátt í afreksbúðum í Mosfellsbæ með frábærum árangri.
Blakdeild Hamars bíður alla unga blakara velkomna. Æfingar eru fyrir 12 ára og eldri á mánudögum frá kl. 19-20:00 í íþróttahúsinu við Skólamörk og á fimmtudögum í Hamarshöll kl. 18:30-19:30 og æfingagjöld eru 0 krónur.
/by

Blakdeild ræður ítalskan þjálfara

Hamar hefur ráðið nýjan þjálfara fyrir bæði blaklið karla og kvenna næsta vetur.

Þjálfarinn, Roberto Guarino, hefur leikið í neðri deildum á Ítalíu og í Kosta Ríka en hann hefur spilað blak frá unga aldri.  Roberto kom til Íslands sem ferðamaður fyrir rúmu ári síðan ásamt kærustu sinni og féllu þau algerlega fyrir landi og þjóð og ákváðu því að flytja hingað nú í sumar.
Gríðarleg blakhefð er á Ítalíu og án efa margt sem Roberto getur kennt áhugasömum blökurum, hvort sem þeir eru lengra komnir eða byrjendur.
Blakdeild Hamars bíður upp á æfingar á mánudögum og fimmtudögum í vetur fyrir karla, konur, byrjendur og lengra komna og börn á aldrinum 10-16 ára og eru allir áhugasamir um íþróttina og heilbrigða hreyfingu hvattir til að mæta og prófa.
/by

Aðalfundur blakdeildar v/2017

Aðalfundur blakdeildar Hamars verður kl. 21:15, þann 8. febrúar næstkomandi í félagsaðstöðunni við Hamarshöll.

Efni fundar:

1. Kosning fundarstjóra og fundarritara

2. Skýrsla stjórnar

3. Ársreikningur og fjármál

4. Kosning stjórnar

5. Önnur mál

6. Viðurkenningar

Allir velkomnir,

Stjórn blakdeildar Hamars

 

/by

1.deildar liðin koma vel undan jólum

1.deildar lið karla og kvenna hjá Hamri byrja nýja árið af krafti.

Kvennalið Hamars sigraði botnlið ÍK, 3-1, í 6 stiga leik gerði svo gott betur og sigraði Vestra, einnig 3-1, í dag í öðrum 6 stiga leik og er nú aðeins 3 stigum á eftir Vestra sem situr í 5.sæti og 4 stigum á undan Fylki sem er í 7. sæti. Með sigrinum tókst Hamri að slíta sig nokkuð frá fallsætunum en liðið á eftir að leika við bæði ÍK og Fylki síðar á árinu.

Karlaliðið vann svo Stjörnuna örugglega 3-1 og er með 11 stig í öðru sæti deildarinnar, í harðri baráttu við Blakfélag Fjallabyggðar og HK B sem eru með 11 og 10 stig.

4.deildar lið kvenna keppir svo í 2. umferð Íslandsmótsins í 4. deild í dag og á morgun en liðið er í harðri baráttu um að halda sæti sínu í deildinni.

 

/by

Fyrsti sigur kvennaliðsins í 1.deild

Kvennalið Hamars í 1. deild fékk Fylki í heimsókn í kvöld.

Leikurinn var svokallaður 6 stiga leikur þar sem bæði lið voru í botnbaráttu og því að miklu að keppa.

Hamar byrjaði leikinn vel og komst í 2-0 í jöfum og spennanfi hrinum. Liðið átti svo erfitt með að halda einbeitingu í 3ju hrinu og tapaði henni 16-25.

4ða hrinan var svo jöfn og spennandi. Hamar lagði allt í sölurnar til að vinna hrinuna og sleppa við að fara í oddahrinu. Fór svo að hamar sigraði 28-26 og þar með leikinn 3-1 og lyfti sér með því úr botnsæti deildarinnar, uppfyrir ÍK sem er án stiga og upp að hlið Fylkis sem er einnig með 3 stig.

/by

Hamarskonur eru haustmótsmeistarar 2017

Haustmótum HSK í blaki er nú lokið en þau voru haldin nú í vikunni.

Karlarnir voru fáliðaðir og misstu menn í meiðsli í miðju móti. Árangurinn var í samræmi við þessi skakkaföll því ekki frásögu færandi.

Hamar 1 í kvennaflokki varð hinsvegar hraðmótsmeistari HSK í kvöld. Þrátt fyrir erfiða kafla í sumum leikjum, tapaði liðið aðeins einni hrinu og vann öruggan sigur á mótinu með 11,5 stig. Hamar 2 hafnaði í 7. sæti með 4 stig.

Alls tóku 8 lið frá 4 félögum þátt í mótinu.

/by